"Kemtuik denok" nogo nebut pen
Kemtuik go yakena-yakena ngga, Demutim, Mlem, Kebeu, Seblom, Banu, Blasu, Wawit, Ambea, Seguolip, Sawiron, Suiapsisa, Demusuo, Suiap, Sewi, Aip, Blamwali, Kebeu, Wasio, Saplung, Mamda-yawang, Kungday, Mamsa-samon, Mamda-dumadi. Nggano, Meikari, Sedingudong, Buglang, Yekui, Kuansu, Klipkau, Smaglang ngge, sedue kabung Kemtuik, no Mlap nebut so pepen go tang.
Yagui 1954, ku 30 April no Kemtuik kabung meno nemot go sui Say Akum Alfonsina Wasanggay lo aya Malui Akum Trang Alexander Bemey nogo so Malap denok gemang tui. Duo ngga nemot go sui: Yaku Kenuim Jacob Bemey so gemang temuit.
Nemot tui go ngga Meikari go yakena amle lo tong go, Mamda-dumadi go deguena, Kluanu Yaku Zeth Kleku lo pu goso. Ngga Semudia yakena, Wolu sik so iti go e... nantuik udong no yam.
Yagui 1960 no seguola SR Mamda klas 1 no gemang deguit, yagui 1963 nogo SR Mamda ngga SD YPK so sui gemang klik. Ngga sik sogo yagui 1966 no Ujian SD daklaya tete sogo SD Negeri Kuansu no keng go, no kua susuoy. Ngga ey, yagui 1967 nogo Ujian SD danamon tete sogo SD Negeri Kuansu no keng gono gemang susuoy. Ngga sik sogo, seguola bloda sono, ngga Sekolah Guru B (SGB) YPK Genyem no gemang degut-sangam.
Yagui 1972 no, SGB YPK Genyem sik sogo susuoy go. Yagui 1973 nogo ngga "Malap kluay" Kemtuik denok so pu go ngganemot, aya ey mia eygo no yakena no tebok go usu kebali-a gemang pupluok.
No, Yagui 1973 no amble tang meno, dia idi sik sogo weng go, nemotnang lo wawi go Genyem no gemang klong. Ngga ey yagui 1975 nogo Kemtuik denok ngge kap go, amble tang meno go sguola Suoli sogo no gemang degut.
Nemot ngga so seguola so maning dedegut gono, yagui 1977 nogo denok ngge klui so lemoy genang sui gemang pung. Nemot-a sui biap kati (Sarmi-Beneraf) nogo so pung go. No, aya Yaap v d Wilden lo pu go sogo so, Mlem no gemang pu go klong.
Ngga ey Kemtuik denok ngganemot Sekolah Alkitab so maning dedegut gono, Kluinang sogo so gemang tuik. No, ku ngganemot nogo aya Jaap nan Blanda sik sogo pung go gemang pu: "Jacob Sarmi nogo yakua klong. No, klui sogo Mlem no se nguok!" Nggano, Mlem sono gemang klong. Mlem no wadikua go klui so mea, no, use go Kemtuik kebali tebok go sesemu go sedue so mea lemoy. Ku ngganemot sik so, Kemtuik denok ngga go dabui Kemtuik Nebut nogo gemang iti. Yakena Mlem no nemot pung go, Kemtuik Nebut sono Wali Deguo Teguop kiklik, ngga ey seguola denok gemang nguguok dali. Ku ngganemot nogo sedue kabung Kemtuik, seguay go babu go naklay Kemtuik nebut so pepen. No, seguola kangok go degut go yakena kangok goso susuing go sedue kabung-a amble nebut sogo gemang pepen. Ngga ey yagui 1980 no Kemtuik naklay nogo seguola Kemtuik Nebut sogo ta gemang mlak go.
